Debabarrenak komunitate osora zabalduko du edukiontzi bidezko bilketa, eta sistema hobetuko du edukiontzi grisarekin

2016/11/23
Debak eta Mutrikuk ere materia organikoaren gaikako bilketa egingo dute, eta birziklatu ezin diren hondakinetarako edukiontzi grisa izango duten Mankomunitateko lehen udalerriak izango dira. Edukiontzi gris hori Mankomunitate osoan ezarriko da 2017. urtean.

Datorren azaroaren 22tik aurrera, biohondakinak biltzeko edukiontzi marroiak instalatzen hasiko dira Deban eta Mutrikun; horrela, beraz, 5. edukiontziaren bidez materia organikoa biltzeko sistema –Mankomunitateko gainerako herrietan dagoeneko ezarrita dagoena– erabiliko dute. Ekimen horren bidez, udalerri horietako gaikako bilketaren ehunekoak nabarmen hobetu (% 35 inguru da gaur egun) eta Europan birziklatze-tasak hobetzeko finkatutako helburuen lorpenean aurrera egin nahi da. Edukiontzi marroiek txartel magnetiko pertsonalizatu baten bidez irekitzeko sistema bat eta erabiltzaileen datuak erregistratuko dituen txip bat izango dute. Adierazitako sistema Mankomunitateko gainerako udalerrietan aplikatzen den bera da, eta erabilera zuzena egiten den kontrolatzeaz gain, herritar bakoitzaren parte-hartze mailari buruzko informazioa ematen du.

Materia organikoaren edukiontziaz gain, birziklatu ezin diren hondakinetarako edukiontzi grisa ezarriko da Deban eta Mutrikun, eta lehen aldiz mankomunitatean. Edukiontzi horrek errefusaren egungo edukiontzi berdea ordeztuko du. Edukiontzi berri hori abenduaren erdialdean instalatzen hasiko da, eta birzikla daitezkeen hondakinak errefusarekin ez nahastea eta birziklatze-tasak hobetzea du helburu. Horretarako, txartel bidez irekitzeko sistema bat eta edukiontzi marroiaren kasuan bezala erabilera eta parte-hartze maila kontrolatzeko txip bat edukiko du. Herritarren erabilera errazteko, bizileku bakoitzeko txartel magnetiko pertsonalizatua bi edukiontzi berrietarako baliagarria izango da.

Mankomunitateko presidente Arcadio Benítezek oso balorazio positiboa egin du Deba eta Mutrikuren parte-hartzearen inguruan, eta adierazi duenez, “bi udalerri horietan materia organikoaren edukiontziak ezartzearen bidez, Debabarrenari azken bost urteotan bilketaren emaitzak bikoiztea ahalbidetu dion zikloa osatuko da”. Edukiontzi grisari dagokionez, Debabarreneko arduradunak honako hau adierazi du: “Mankomunitateak 800.000 euroko inbertsioa egingo du 2017an, sistema hori gainerako udalerrietara zabaltzeko; Europak birziklatzearen arloan ezarritako helburuen lorpenean aurrera egiteko apustu garbia da”.

Informazio-kanpaina

Materia organikoaren eta errefusaren edukiontzi berriak ezartzearekin batera, zerbitzu berriaren xehetasunak ezagutzera emateko informazio-kanpaina bat egingo da Deban eta Mutrikun. Kanpaina horren barruan, gaikako bilketari buruzko informazioa emango duen gutun bat eta zerbitzuan alta emateko eta parte hartu nahi dutenek beharrezkoak diren material guztiak jasotzeko inprimaki bat jasoko dute herritar guztiek. Halaber, informazio-hitzaldiak emango dira bi udalerri horietan, eta izena emateko eta edukiontziak irekitzeko txartel pertsonalizatuak jasotzeko bulegoak gaituko dira. Udalerri bakoitzean bulego bat egongo da, eta ordutegi jarraituan egongo da jendearentzat zabalik, 11:00etatik 20:00etara (astelehenetik ostiralera) edota 09:00etatik 14:00etara (larunbatetan). Kanpaina, herritarrei ez ezik, hiri-eremuko sortzaile bereziei ere (hots, saltokiei, ikastetxeei, elkarte gastronomikoei eta abar) zuzenduta egongo da. Kanpainaren barruan, doako telefono-zenbaki bat eskainiko da (900 10 43 42), sortzen den zalantza oro argitzeko.

Jardun horietan laguntzeko, informazio-kartelak ipiniko dira leku estrategikoetan, eta hitzaldien egutegia eta bulegoen helbidea eta ordutegia adieraziko da bertan. Halaber, itsasgarri batzuk ipiniko dira errefusaren egungo edukiontzi berdeetan (hilabeteko epean, edukiontzi gris berriekin ordeztuko dira). Itsasgarri horietan, orain arte errefusaren edukiontzian uzten zen materia organikoa beste edukiontzi batean (hots, edukiontzi marroian) utzi beharko dela adieraziko da. Informazio-prozesuak hilabeteko iraupena izango du, eta, epe hori igaro ondoren, bigarren gutun bat igorriko da izena eman ez duten pertsonen bizilekura.

Deskribatutako kanpainaren esparruan, biztanle guztiek hainbat material jasoko dituzte, zerbitzuan behar bezala parte har dezaten. Zehazki, materia organikorako poltsa konpostagarriak eta kubo bat, edukiontzi bakoitzean sartu beharreko hondakinei buruzko informazioa bilduko duen liburuxka bat eta edukiontzi berriak irekitzea ahalbidetu eta egindako erabilerak erregistratuko dituen txartel magnetiko pertsonalizatu bat emango zaizkie.

Iruzkin bat gehitu

Logeatuta egon behar zara iruzkin bat gehitzeko. Twitter bidez sartu zaitezke. Zure iruzkina moderatu egingo dugu.