Mankomunitateak kaleak garbitzeko 24 orga erabiltzen ditu udalerrietako zakarrontzietako hondakinak biltzeko

Eskualdeko udalak bide publikoan lau zatikiko paperontziak jartzearen aldeko apustua egiten ari dira, izan ere,  baliabide bat dira birziklapenaren eta ingurumenaren inguruan herritarrak kontzientziatzeko eta hezteko, etxean ez ezik, eguneroko bizitzako eremu guztietan ere hondakinak bereizteko ohiturak sortzeko.

Mankomunitateak, udalekin lankidetzan, aholkularitza eskaintzen die zakarrontzi mota egokienei, horiek instalatzeko leku aproposenei, alderdi teknikoei eta abarri buruz.

Bide publikoko paperontzien bidez bildutako hondakinen kilogramoak ezin dira edukiontzien bidez bildutakoekin alderatu, kopuruak oso desberdinak direlako, baina bide publikoetan lau zatikiko paperontzien presentzia garrantzitsua da, hauen funtzioetako bat delako eremu pribatuko birziklatze-ohiturak eremu publikoan ere aplikatzea.

Lau zatikiko 99 paperontzi Debabarrenan

Egun, guztira, lau zatikiko 99 zaborrontzi daude eskualdeko udalerrietako kaleetan, eta, birziklapena eta herritarren kontzientziazioa sustatzeko dinamikari jarraituz, datozen urteetan kopurua handitzea espero da.

Horrenbestez, Mankomunitateak hondakinak biltzeko zerbitzua egokitu eta zabaldu behar izan du, lau zatitan banatuta dauden paperontzietako hondakinak gaika biltzeko, eskualdeko gaikako bilketa hobetzeko helburuarekin. 2020an, Mankomunitateak 10.262,30 euro inbertitu zituen kaleak garbitzeko 24 orga erosteko, gehienak lau frakziokoak: organikoa, papera eta kartoia, ontzi arinak eta errefusa.

Zein hondakin utzi paperrontzien atal bakoitzean

Paperontziek lau atal desberdin dituzte. Marroi kolorekoa, non hondakin organikoak bota behar diren, hala nola fruta-azalak, pipak, ogia edo janari-soberakinak; urdina, non erosketa-tiketak, etiketak, gutun-azalak edo paper eta kartoi hondakinen beste mota batzuk utzi behar diren; horia, non ontzi arinak utzi behar diren, hala nola litxarreria-poltsak, plastikozko poltsak, patata-poltsak edo latak. Eta, azkenik, gainerako hondakinak atal grisean utzi behar dira.