115.600 kg hondakin jaso dira edukiontzietatik kanpo lehen seihilekoan

2022/09/12
• Mankomunitateak gogorarazten du edukiontzien kanpoan uzten diren hondakinak ez direla birziklatzen, nahiz eta dagokion koloreko edukiontzi kanpoan egon.

115 tona hondakin jaso dira lehen seihilekoan Debabarrenako edukiontzien kanpoaldean, honek esan nahi bataz beste 645 kg jaso zirela egunero. Hori horrela, Mankomunitateak herritarrei gogorarazi nahi die hondakinak edukiontzi barruan utzi behar direla, kanpoan uzten diren hondakin solteak eta hondakin poltsak ez baitira birziklatzen, hau da, errefusara doaz zuzenean.

Mankomunitateak inspekzioak egiten jarraitzen du eskualdeko edukiontzi puntuetan, eta dagoeneko neurriak hartzen ari da hondakin poltsak edukiontzien kanpoaldean uzten dituztenekin. Esaterako, uztailera bitarte 59 inspekzio egin ditu Mankomunitateak eta, horiei jarraiki, atestatu bat egin du udaltzaingoak. Izan ere, hondakin hauek ingurua zikintzeaz gain, kamioiek jasotzen dituztenean ez dira birziklatzen, nahiz eta poltsa barruko hondakinak modu egokian sailkatuta egon.

 

Hondakin mota bakoitzak bere bidea egiten du

Gaikako bilketa egiten duten kamioiak puntuetatik igarotzen direnean, edukiontzietako hondakinak jasotzen dituzte eta kanpoan geratzen diren poltsak atzetik igarotzen den beste kamioi batek jasotzen ditu, eta honek ezin ditu poltsa guztiak bereiztu.

Behin kamioiek hondakinak gaika jasotzen dituztenean, hondakin bakoitzak bere bidea egiten du: hondakin organikoak Epelera (Bergara) bideratzen dira konpost bihurtzeko, papera eta kartoia Zornotzara (Saica enpresera) bideratzen dira birziklapenerako, ontzi arinak Legazpira bideratzen dira, Ecoembes-era, plastiko gogorra Aizarnazabalera (recuperados Isasi) eramaten da eta, azkenik, egurra Legazpira (Egondo).

Mankomunitateak gogorarazten du kartoi komertziala soilik utzi daitekeela edukiontzi kanpoan, dagokion ordutegian:

 

Ermua

15:00etatik aurrera

Eibar

13:30etatik aurrera

Soraluze

18:30etatik aurrera

Elgoibar

18:00etatik aurrera

Mendaro

17:30etatik aurrera

Deba

16:30etatik aurrera

Mutriku

17:00etatik aurrera

Iruzkin bat gehitu

Logeatuta egon behar zara iruzkin bat gehitzeko. Twitter bidez sartu zaitezke. Zure iruzkina moderatu egingo dugu.