Debabarrena eskualdeko mankomunitateak 11,2 milioiko aurrekontua onartu du 2015. urterako

Debabarreneko Mankomunitateak 11.222.581 €-ko aurrekontua onartu du 2015. urterako. Ahalegin ekonomiko nagusia hiri-hondakinen gaikako bilketara eta kudeaketara bideratutako partidetan ikusten da, partida horien zenbatekoa 7.299.930 € baita, guztizkoaren ia bi heren. Atal horretan, birziklapena sustatzeko eta bultzatzeko mankomunitateak inbertituko dituen baliabideak nabarmentzen dira, 1.315.507 € bideratuko baitira inbertsioetarako, sentsibilizazio-jardueretarako eta gaikako bilketa hobetzeko prozesuetarako. Jardun horien artean honako hauek nabarmentzen dira: 183.000 € biohondakinaren gaikako bilketarako poltsak eta ontziak erosteko; 170.000 € paper eta kartoiaren gaikako bilketarako; 144.000 € ontzien bilketarako bideratuko dira, eta 68.000 € ingurumen-hezkuntza eta -sentsibilizaziorako jardueretarako bideratuko dira (ikus taula). Arcadio Benítez mankomunitatearen presidenteak nabarmendu du “2015eko aurrekontuak argi uzten duela birziklapenean aurrera egitea dela lehentasuna, 2014an lortutako hobekuntzak sendotzeko eta % 60ko helburura hurbiltzeko”.

Aipatutako jarduerez gain, birziklapenaren alorrean honako ekintza hau nabarmentzen da 2015erako: Etxeko Hondakinetara Asimila daitezkeen Hondakin Industrial, Komertzial eta Instituzionalen bilketa ezartzea Debabarreneko udalerrietako herriguneetan kokatuta dauden establezimenduetan, enpresetan eta industrialdeetan.

Hondakinen kudeaketarako bideratzen diren 7.299.930 €-etatik, 4.665.964 € mankomunitatearen kostuak dira, gaikako bilketak eragiten dituenak, eta 2.633.966 € GHK-ri ordaintzen zaizkio sortutako errefusa tratatzeko. Horri dagokionez, mankomunitateak nabarmentzen du zenbateko horren ehuneko bat oraindik garatu gabe dauden eta garatuko diren tratamendu-azpiegituretarako erabiliko dela.

Diru-sarreren atalari dagokionez, baliabideen iturri nagusia udalek ordaintzen dituzten kuotek osatzen dute, kuota horiek hondakin-kudeaketako eta kale-garbiketako zerbitzuek eragiten duten kostua ordaintzeko dira. Kontzeptu horiengatik, mankomunitateak 10.656.190 € jasotzen ditu, eta diru-sarrera horiek Ecoembesi fakturatutako zenbatekoekin eta paperaren salmentarekin osatzen dira batez ere. Zenbateko horien kopurua 490.748 € da.