Abian da Mankomunitatearen kontzientziazio kanpaina Gabonetan birziklapena sustatzeko

2020/12/18
Gabonetako pertsonaiak dira protagonista, Olentzero eta Mari Domingi, Hiru Erregeak eta Santa Klaus, eskualdeko adin eta jatorri guztietako pertsonengana iristeko.

Martxan da Debabarrena Mankomunitatearen kontzientziazio kanpaina Gabonetan birziklapena sustatzeko. Gabonetako pertsonaiak dira kanpainako protagonistak eta mezua helarazteko arduradunak: Olentzero eta Mari Domingi, Hiru Erregeak eta Santa Klaus.

Gabonetan sortzen dugun hondakin kopurua nabarmen handitzen denez, egun berezi hauetan ezinbestekoa da hondakin bakoitza dagokion edukiontzira botatzearen garrantzia azpimarratzea. Debabarrenako Ingurumen teknikariak adierazi duenez, “Mankomunitateak 2030 urterako %70eko gaikako bilketa lortzea du jomuga, eta horretarako ezinbestekoa da herritarren lankidetza. Eskualde mailan gaikako bilketaren inguruko lanketa bateratua egin nahi da kontzientziazio kanpainaren bidez, herritarrak hondakinen kudeaketaren inguruan kontzientziatzeko eta hobekuntzak lortzeko. Lehen urratsa besterik ez da hau.”

Kanpainaren leloa da #GabonetanIzanGarbi. Mankomunitateak gutun bat bidali du gabonetako pertsonaien izenean eskualdeko etxebizitza guztietara eta sare sozialetan zabaltzeko bideo didaktikoak ere ekoitzi ditu, non gabonetako pertsonaiek hondakin mota bakoitza zein edukiontzitan utzi behar den azaltzen duten. Beste hiru bideo ere egin dira eskualdeko kaleetan barrena, sareen bidez hedatzeko.

Abenduaren 18tik urtarrilaren 6ra bitarte iraungo du kanpainak eta eskualdeko herritar guztiei zuzenduta dago: “Debabarrenan bizi diren adin eta jatorri guztietako pertsonengana iritsi nahi dugu Gabonetan birziklapen tasa igotzeko, horregatik baliatu gara gabonetako pertsonaia guztiez. Ezagunak eta entzunak dira. Normalean guk eskatzen dizkiegu opariak, baina aurten haiek ere eskakizun bat dute gu guztiontzat: Gabonetan Debabarrenan sortzen ditugun hondakinak egoki birziklatzea.”

 

Birziklatzen ez duenari… ikatza.

Prentsaurreko berezi batean aurkeztu du Mankomunitateak Gabonetako kontzientziazio kanpaina. Olentzero, Meltxor Erregea eta Santa Klaus bertaratu dira Eibarko Untzaga plazara eta adierazi dute “Gabon hauetan oparietan, bazkari-afarietan… sortzen diren hondakinak behar bezala birziklatzea” dela euren nahia,  “hondakin bakoitza dagokion edukiontzira botatzea.” Gainera, oker birziklatzen duenak ikatza izango duela opari azpimarratu dute.

Iruzkin bat gehitu

Logeatuta egon behar zara iruzkin bat gehitzeko. Twitter bidez sartu zaitezke. Zure iruzkina moderatu egingo dugu.